Gülgûn Kabâsı Ol

Gülgûn kabâsı ol sanemüñ sanki lâledür

Cism-i latîfi lâle-i hamrâda jâledür

Karşumda allar geyüp ol lâle-ruh yine

Gülgûnîlerle ‘aklum alur san piyâledür

Tâk-ı cefâda manzara-i çeşm-i dil-rübâ

Kûy-i belâda hâne-i câna havâledür

Sünbül takınmış alnına sanmân o gül-’izâr

Çıkmış külâh-gûşeye târ-ı külâledür

Kûyuñdan itse ‘azm-i sefer cân-ı mübtelâ

Zâd-ı reh ana gussa vü nâle nevâledür

Bir bezme mîr-i meclis olupdur göñül k’aña

Bahr-i muhît cür’a vü gerdûn piyâledür

Bâkî sipihr âhum okına siper tutar

Fark-ı felekde zâhir olan sanma hâledür