Der-vasf-ı Sarây-ı Ferîdûn Beg

Te’âla’llâh zehî tâk-ı bülend-i âsmânâsâ

Hezâr ahsent ey burc-ı felek-kadr u semâ-sîmâ

Aceb beyt-i musanna’dur bulınmaz degme dîvânda

Ferah-bahş u safâ-güster neşât-engîz ü rûh-efzâ

İki mısrâ’ iki yanında hoş mevzûn u dil-keşdür

Der-i devlet-sarây-ı dil-güşâ bir matla’-ı garrâ

Harîm-i hâsa yol virmez açılmaz şahs-ı nâ-dâna

Nigâr-ı pâk-dâmendür münakkaş perdesi gûyâ

Murassa’ câmlarla bir ‘aceb şâhâne meclisdür

Düşinde görmedi Cem böyle ‘işret-hâne-i zîbâ

Görüp ol câm-ı gül-rengi seherden eyler âhengi

Sanur güllerle zeyn olmış kafesdür bülbül-i şeydâ

Nedür ol gûşe-i bâmındaki âvîzeler dirseñ

O zîbâ turraya bir şânedür kim itdiler peydâ

Dem-â-dem sîm ü zer micmer kılur ol turraya hem-ser

Duhân-ı ‘ûd u ‘anberden kemend-i zülf-i müşgâsâ

Libâs-ı hüsn ile bir şûh-ı sîm-endâma dönmişdür

Der ü dîvârı zeyn olmış ser-â-ser atlas u dîbâ

Letâfetde ruhâmı sîm-i hâmı itdi bî-ragbet

Mücellâ mermeri mevcin görenler sandılar hârâ

İrem bâgı aña nisbet degül bir taşına kıymet

Egerçi kıymeti taş iledür bünyâdı ser-tâ-pâ

Zülâlinden ‘ibâretdür nesîminden kinâyetdür

Safâ-yı çeşme-i Kevser hevâ-yı Cennetü’l-me’vâ

Nice matbû’ u mevzûn olmaz ol kasr-ı mu’allâ kim

Aña mi’mâr ola tedbir-i sâhib-re’y-i mülk-ârâ

Cihân-ı himmetüñ bahr-i firâvânı Ferîdûn Beg

Ki üstine habâb olmış anuñ ol kubbe-i ‘ulyâ

Sütûr-ı nâmesinden mülk ü millet sebzesi hurrem

Sütûn-ı hâmesinden dîn ü devlet haymesi ber-pâ

Sadef gûşın müzeyyen kılmag içün dürr-i lafzından

Kelâmın istimâ’ eyler pes-i dîvârdan deryâ

Dühûl-i meclis-i hâsına ruhsat mümkin olmazsa

Buhârîden gelür diñler hadîsin tâlib-i ma’nâ

Hezârân mürdeye bir demde lutfuñ tâze cân virdi

Mesîhâ resm ü âyînin muhassal eyledüñ ihyâ

Cihânda bir kurı adı kalupdur çeşme-i Hızruñ

Sen eylersin bu gün Âb-ı hayât ahkâmını icrâ

Kef-i cûduñ vücûd iklîmine bir tarh-ı nev saldı

‘İmâret buldı lutfuñla sarây-ı kühne-i dünyâ

Sipihrüñ nitekim câm-ı zümürrüdfâmı devr eyler

Olur ‘işret-sarây-ı halk tâ nüh günbed-i hadrâ

Cihânda sâgar-ı devlet murâduñ üzre devr itsün

Göñül hoşlıkların kılsun müyesser Hazret-i Mevlâ

Nigehdâruñ Hudâvend-i zemîn ü âsmân olsun

Cihân turdukça âbâd olsun ol tâk-ı felek-fersâ